活動名稱：TrailWatch X Watershed Hong Kong：紀念香港保衛戰導賞團
日期： 2018年12月22日 (星期六)
地點：城門郊野公園
Trailwatch徑‧香港 X Watershed Hong Kong 合辦
紀念香港保衛戰導賞團
今年係香港保衛戰的77週年，戰爭由1941年12月8日開始，直到12月25日香港總督楊慕琦爵士投降、12月26日全體駐港英軍投降結束。 TrailWatch今年特意邀 Watershed Hong Kong 合作，帶大家到城門水塘一帶，重演兩軍士兵裝備，講述醉酒灣防線的故事。
「三年零八個月」聽得多，但其實係點解會出現？今個月嘅TrailWatch專題就係同大家介紹喺「三年零八個月」之前嘅「香港保衛戰」。歷史事件好似離我哋好遠咁，但其實好多熱門嘅行山地點，都屬於「香港保衛戰」嘅戰線入面。
77年前嘅12月8日，即係1941年嘅12月8日，日軍分頭進攻，一隊由沙頭角起行，經沙螺洞向大埔出發；另一隊深圳福田進攻新界西北錦田一帶，仲炸埋啟德機場添！香港保衛戰正式開始。
當時仲係英國殖民地嘅香港，由一隊五千個英軍、四千個印裔英兵、二千個加拿大兵同埋千零個香港華人英兵，呢班唔同國籍所組成嘅軍隊，一致都只有「保衛香港」呢個目標，一齊抵抗進攻嘅日軍。
如果大家有行過麥理浩徑第6段，相信都會見過一個個好似隧道口嘅建築，細心睇仲會發現上面有英文比如Regent Street（攝政街）、Shaftesbury Avenue等喺倫敦出現嘅地方。其實嗰度就係香港保衛戰入面，佔一席位嘅城門碉堡。
77年前的12月9-10日，呢一個由英軍喺30年代建成嘅城門碉堡入面，就發生一場戰事。當時碉堡由蘇格蘭兵團駐守，而日軍由針山開始進攻，見到城門碉堡守軍唔多，發動偷襲，成功喺幾個鐘之內就攻佔碉堡，擊退英軍。
而家碉堡嘅入口、軍用座標同指揮部依然清晰可見，下次再去城門水塘一帶行山，都可以留意下呀。
